Kolye ki pi bèl, ki pi chè
mwen toujou fyè kenbe nan kou m toutan
se kolye 2 bra w, manman cheri.
Flanm afeksyon w limen anndan m
yon brazye lanmou ki vi n pi cho
chak fwa m’di : Manman !
Manman gen pouvwa fè lavi boujonnen jèmen.
Lè kay la blanch, se manman ki toujou jwenn ladrès
ak 10 dwèt li pou defèt nedouk sentrebas grangou midi.
Manman s’on pon sou flo pwoblèm n’ap travèse. Li gen sekrè
efase tritès, fè bèl souri griyendan parèt sou figi frijèt.
Manman cheri, ou se fèy ki kase kouvri tout fopa m.
Ou se blayi ki efase blanchi tout tach sou do m, tout sa yoyo di.
Ou se konprès ki kalme dedi tout sa m soufri.
Chak moun sou tè a g’on kwa y’ap pote.
Mèsi manman. Ou ban m egzanp ladrès pliye
transfòme kwa pa m, fè l tounen yon pon
pou m janbe tout peripesi k’prezante.
Prezans manman pakapala !
Lè sa pa bon, lavi ap ban n baf desounen n delala n
Bòkote n, manman kanpe la !
Lè sa bon, lajwa pete nan gwo ekla ri.
Bòkote n ankò, manman toujou la !
Manman cheri, ou se flè lavi m.
Domaj ! 2 men m vid. Pòch mwen koule.
Se avèk dlo nan je m m’ap wouze yon si bèl flè tankou w.
Men, nan fon kè m ,manman,tout kalite bon flè santibon ap fleri
toutan m’ap viv pou temwaye : Bonte w, Dousè w, Afeksyon w.
Emmanuel Albert (Toto)