Tan

Tan sé on mo ki ni bon enpé sans an kréyòl.
Dabò pou yonn, ou ni tan ki sé zouk : "Ola tan-la ka bay oswèla ?". Ou ni tan ki vé di tèlman : "An tan fen !". Ou ni tan ki sé "ta" douvan nou é mwen, sé konsa ou ka di "kaz-lasa sé ta-y, mé kaz-lasa sé tan mwen, kaz-lasa sé tan nou.Ou ni tan ki tan i ka fè : "on vyétan", "on tan lèd". Mé nou ka di "on bèl botan". "Tan-la maré" lè tini gwo niyaj nwè an syèl-la, ki vé di lapli kay tonbé. Ou ni tan ki sé sézon. Ni "tan a lapli", "tan a chéchrès". Ni "tan a zoranj", "tan a fanbwayan"," tan a zaboka". Sé pousa tipawòl-la ka di : "ni tan é sézon pou tout biten".
Sé menm biten ki ni "on tan pou planté, on tan pou rékòlté", "on tan pou ri, on tan pou pléré", "on tan pou chasè, on tan pou jibyé". Tini tan é sézon pou chak biten.Ni moun yo ni tan é sézon, ki vé di ou pa jan sav ola ou yé èvè yo.Mé annou pa pèd tan. Ni tan j`di é ni tan dyab té tigason. An tan kòk ké ni dan. Tout biten sé pou on tan. Epi ni on ti chanté "An tan lontan wi sa té bèl, an tan Chonnon é Izabèl...".
An tan Soren moun ka di sa té rèd.
Mé tipawòl-la an pisimyé la sé "TAN LONG, LAVI KOUT".
Extrait de "Kamo"
Rèspé ba Èktò Poulé & Silvyan Tèlchid !!!