Nwèl O...

"Dépi dènié simenn a novanm, nou té ka chanté kantik san mizik an fen a chak simenn. Bòdé-la té ka komansé lè 24 a minui. Mé sé boug-la té ka komansé dè Nwel dépi adan apré-midi la. sé madanm-la té ka respekté mes é labitid a péyi-la plis, é yo té ka sèvi bwè é manjé enki apré lanmes-minui. Nou té ka pasé kaz an kaz tout lannuit-la jis landèmen apré-midi. sé madanm-la té ka rété chanté kantik andidan sé kaz-la é yo té ka sèvi bwè é manjé pou tout moun ki té pasé koté yo. sé nonm-la é sé jennjan-la té ka drivé an lari-la ka jwé mizik, é yo té ka pasé kaz an kaz.
Yo té ka bwè wonm kon dlo, é pou yo pé sa bwè plen vant a yo, yo chak té tini on rimed. Yo té ka prévwa kek mòso mori salé oben kek zoranj, gran bonè, pou yo pa sou ; yo té ka paré rafréchi pou nétwayé fwa a yo. Yo té sav yo té k'ay chiré Nwel-la a tout.
Yo té ni on chanté yo té k chanté avan yo rantré adan on kaz... é on lot chanté pou lè yo té ka pati. Sé moun-la té kontan wousouvwè yo. délè, on bann a trant moun té pé débaké si'w. Yo té ka sèvi bwason adan tou piti vè. Mé manjé-la pa té si kat, neg ! Diri, ziyanm, pwa-di-bwa, viann-kochon a koulé... Nwel sé té on fèt moun té ka partajé épi fanmi é vwazen."
Extrait de Benzo raconte...
"Lavi lontan pa bò kaz an mwen"