Mwen sé Gwadloupéyen

Mwen sé timoun enkyèt
a on lilèt enkyèt
Onti lilèt pri nèt an zatrap a dé pyèt
a on vyé krab-wontèz
On pyèt anlè, on pyèt anba
On vyé krab-lanmè téré fon fon fon
Anba ròb a volan a gran-manman lanmè
Sé gran savan ki ékri sa
Lèwvwè sé pyèt anlè ki pran lanmen
Mi tout lilèt an mwen ka trapé latranblad
Simétan pyèt anba té ké anvi pyété
Mi kriz malkadik ka boulvèsé la Soufriyè
Apré sa kijan fè ou vlé fè mwen kwè mwen sé vou
Vou sé mwen ?
Mwen tala !
Pitit enkyèt a on lilèt enkyèt
Vou sé vou akaz aw
Zafè aw bèl !
Mwen vlé mwen menm
Sé kòz an mwen... Sé mwen ki an kòz
Di-y fò : mwen sé gwadloupéyen
Mwen sé timoun enkyèt a on lilèt enkyèt
Onti lilèt pyé pou tèt
Bosi anba, tou plat anlè
Anlè tou plat : Travayè ka véyé douvan chiminé san lafimé a lizin zòt ja fèmé
An lizyè a pyès-kann zòt vann si pyé pou planté kaz é chimen
Anba bosi : Tout moun anbab si bòlari dépi lè zòt té fè yo pè pa èspwé
Jou chiminé a Soufriyè té voyé sann ay désann...
Anlè tou plat : Granntè
Ni tè... Men pani tè pou sa ki bizwen travay tè
Ni dlo... Men pani dlo pou sa ki bizwen ti-gout dlo
Anba bosi : Bastè
Menm bab osi
Lavi chalviré, men pani pon pyé pou tèt !
Mwen sé timoun enkyèt a on lilèt enkyèt
Onti lilèt ki pé mayé é démayé alè pou alè
Gwo soley é ti-fifin
Loraj anrajé épi bèlbotan
Siklòn é kalmipla
Ravin gonflé épi ma sèk
Anmitan tout similak lasa
Ki syèl masyé tèt ay anba sa sann a niyaj
Ki lè labriz kon lépensèt pwòpté récho a syèl
Foyé-difé a mon Konpè Soley toujou la ka chofé
Cho kaché - Cho délivrans
Ki ou vwè-y, ki ou pa vwè-y
I la la ay !
E vou pòv mal papay, ou vlé sèvi-y papa
Ou ka révé rivé a raché nou pa fòs anba-y
Sé nou ki chabon ay
Konsidéré i tan nou !
Mwen sé timoun enkyèt a on lilèt enkyèt
Onti lilèt ki vwè parèt é disparèt syèk dèyè syèk
Disparèt é parèt
Fanm é nonm zòt senné kon ban pisyèt
Fan é nonm zòt dékatyé fanmi a yo
Fanm é nonm zòt vann anba laplas a lankan kon bèsyo
Fanm é nonm zòt maké kon bèsyo
Zòt maré kon bèsyo
Fanm é nonm ki trimé kon bèt anba fwèt a zòt mèt
Sé fòs a yo ki mofwazé gran bwa an jaden ba zòt mèt
E zòt fè fòs a yo sèvi yo foséyè pou yo menm mèt !
Jòdijou mwen pé gadé-w anmitan zyé san bat zyé pou di-w
Mwen sé fanmi a sé fanm é nonm chikayé lasa
Pitit a tout sé-la zòt té raché anbala an tè a yo
E ki téré isidan an tè a yo
Pitit a tout san tit
Pitit a tout langaj mélanjé
Pitit a tout bazann fonn an kann é bannann
Wouj, blan, nwè, malaba
Ki bityé bwa ba zòt
Men yo pran bwa osi
Pou mawon zòt osi
Pou bwavé zòt osi
Pou té grajé on sèl langaj asi graj a yo chak
Pou yo té konnyé Gwo-ka kon kè a yo té ka konnyé
Pou té désann kon flanm difé asi pérézité a zòt
Pou yo pa té disparèt kon bèt anba tè
Pou yo té rézisté
Pou yo té libéré asi tè lasa menm... é pa an paradi !
Yo gannyé tit a yo pou pitit a yo tout
Pou nou ki la alèkilé pa té koulé
E nou pa yo ankò. Sa vré !
Nou ti-nèg mawon a tout koulé po mélanjé
On sèl nasyon gwadloupéyen las adan nas a zòt
Nou ké sòti
On zyé dèyè pou vénéré a dèy an nou
Yonn chak koté pou nou kenbé labriz
On dòt anba pou nou pa jan néyé
Douvan : on dènyé zyé pou véyé douvan-jou
Evè tout fòs a foséyé an nou sanblé
Nou ké fouyé on fòs ba zòt fon, fon, fon...
Aprézan kijan fè ou ké fè mwen kwè mwen sé vou
Vou sé mwen ?
Mwen tala !
Pitit a on nasyon ki ni asé
Vou sé vou,défann kòz aw a kaz aw
Mwen sé mwen-menm
Sé kòz an mwen... Sé mwen ki an kòz
Wi, mwen sé gwadloupéyen
Teks : Sony Rupaire
Mizik : Dominik Coco - Mwen sé Gwadloupéyen
(2008 - Lespri kaskòd)
Espésyal dédikas à un inconnu bien connu qui se reconnaîtra :D